生活圈子中總有些人係你唔熟但又一直沒有消失，交情比陌生人好一點，大家不常見但channel互通，相敬如賓。朋友的兄弟姐妹，搭上搭的朋友同學，以至他們的另一半，都屬此類。託老朋友的福，請了一桌人陪食飯，仲有禮物收。一年不見，木口木面的會笑了，幸福的更幸福，很好很好。
去年在歌賦街牛記，不亦樂乎；今年在生記，全餐最好食：白糖糕。鬆軟，吃後不帶太重酸味。
枸杞豬膶，據說是名菜。吃後覺得一般，是及格的，但未至於超高班，富瑤的師傅灼得更好。切得太大，酒家價錢，大牌檔的賣相，這也是打後所有菜式的通病。
椒鹽鮮魷，是至愛的小菜之一。這碟的魷魚未發育便身先士卒，似食脆漿多過食魷。
梅菜蒸菜，虧有人諗到呢個配搭。菜心吸了梅菜的味道，原來係咁好食的。
煎藕餅，也是名物。但我己不記得它的味道了。反而牛記的煎肉餅，我仲記得喎。咁囉。
剝了殼後無乜味的蝦碌。
鯪魚肉釀豆腐。只是將肉撻上豆腐上蒸熟，好聽Ｄ，叫做原汁原味；唔好聽，係懶。
泥鯭粥。對於這類不特別喜歡也不討厭的食物，以至人，我都無乜評語的。只能說，粥底不是很差，但也不算綿；朋友說，小時候灣仔有街邊檔更好吃，其兄又推介附近「靠得住」。
我不知道廚師是誰，但我想像它就似是一個好懶的家庭主婦煮出來的飯。不過旨不在食飯，飯腳啱咀形便可。
生記飯店
灣仔軒尼詩道107-115號2-3/F（修頓球場對面）
2575 2239
